Ourives de Compostela
Auténtica Ourivaría Ancestral de Santiago.
A marca Ourives de Compostela garante que aquelas pezas que a levan foron creadas con metais nobres por ourives composteláns utilizando as técnicas tradicionais dos antigos gremios de prateiros e acibecheiros da cidade de Santiago.
Os actuais ourives son herdeiros e depositarios dun antiquísimo saber que se remonta aos tempos fundacionais da cidade. Os mestres que lles precederon crearon, conservaron e transmitiron as antigas técnicas que foron pasando de pais a fillos ao longo dos séculos ata os nosos días. Novas técnicas fóronse sumando desde entón ata hoxe pero sempre conservando o seu carácter único e o traballo artesanal.
Os ourives composteláns traballan principalmente con prata de Lei e acibeche. O acibeche é un mineral de orixe vexetal orixinada baixo terra, froito das altas presións ás que foron sometidos os troncos dalgunhas especies de árbores durante un período duns 150 millóns de anos. A súa dureza, a súa cor negra intensa e o seu brillo dótano dunha beleza singular.